Sasaga na Lewenikoro ena Veivakatorocaketaki

E ra duavata na lewe ni koro ko Tuvuca mai Vanuabalavu e na nodra sasagataka me vakatoroicaketaki na nodra koro e na kena tali na ibe me volitaki.

Nai lavo e rawati mai ena isau ni ibe me na qai voli kina na batiri ni nodra sola ni koro.

Na cakacaka oqo e ra sa cakacaka vata kina na turaga kei na marama e na kena laki vidai mai na voivoi.

Oqo na veika e vakaraitaka ko Ruci Tabaiwalu mai na koro ko Tuvuca.

E vakaraitaka ko Ruci ni sa tiko nodra takete me rawata e $6000 mai na cakacaka oqo.

E kaya ni’ra a tekivu e na tau soli ka’ra raica ni sega soti ni lako vinaka me vaka ni levu vei ira e ra tiko ga e nakoro ka sega talega na ivurevure ni ilavo vinaka.

Na solesolevaki ni tali ibe oqo e qai matai ni gauna me vakayacori kina me veivuke vei ira na lewenivanua e na kena vakabatabatataki na ika kei na veika tale e so e na kato ni wai liliwa.

Era veivuke na turaga ena kena cibini na voivoi ena sasaga ni veivakatoroicaketaki ena koro ko Tuvuca.

“Na sasaga oqo e bosei mai e na bose vakoro ka sa keimami mai sasagataka sara me rawa.“

Ni oti na bose oya, e ra sa sasaga saraga na marama kei na ira na turaga me vidai na voivoi ka me tali na ibe me vaka ni dua na ivurevure ni ilavo vinaka na ibe.

“E liu keimami dau volitaka ga na ibe me rawati kina na bula ni neimami matavuvale, ia na solesolevaki keimami cakava oqo me baleta saraga neimami koro.“

Vakaraitaka ni vurevure ilavo levu taudua i Tuvuca sa i koya na volitaki ika kei na ibe ka levu na gauna e ra dau volitaka tikoga kina Flea Market e Suva.

Gauna oqo e sega ni sivia na 100 na lewenikoro e ra veivuke tiko e na sasaga oqo.

E so era sa solia na nodra ni voivoi e na nona yalovinaka e na kena nanumi tiko ga na nodra bula na lewenikoro.

E vakaraitaka ni tauri ira e rua na siga na kena toci ka saqa tiko na voivoi ni bera ni tali na ibe.

E ra navunavuci tiko na lewenikoro me na oti na cakacaka oqo me na dua tale na solesolevaki na ta niu me vukea tikoga na kena voli na batiri ni sola.

Na voivoi era sa vakasaqari oti ka’ra sa vakaliligi tu ni bera ni qai tali na ibe.

E levu sara nai tuvatuva e ra sa tuvalaka tiko na lewenikoro e na kena vakavinakataki na nodra koro. Oqo me vaka na ba ni ua me vaka ni sa tekivu drodrova tiko yani vakamalua na nodra koro na waitui e na vuku ni veisau ni draki eso.

Vakaraitaka ni nodra sasaga oqo era sa kerea oti kina matanitu, ia e se bera ni dua na kena macaala.

E vakavinavinakataka na Kalou ko Ruci e na nona solia tiko na yalo ni cakacaka vata kei na yalovinaka me rawa kina ni’ra qarava vata vakalewenikoro na sasaga yaga oqo.

Veivakasalataki tiko vei ira na lewenivanua ni sasaga vaka oqo e ra rawa ni rawata kece, ia e tiko ga kina na yalo ni cakacaka vata, lomavata kei na veilomani ka usutu levu taudua tikoga me rokovi tikoga na Kalou e na veigauna taucoko.

Vakatataro: salaseini.guniyaga@fijisun.com.fj